Baraay-e-naam sahi koi meherban to hai

Baraay-e-naam sahi koi meherban to hai,

Hamare sar pe bhi hone ko aasmaan to hai,

Teri faraakh-dili ko duaaen deta hun,

Mere labon pe tere lams ka nishaan to hai,

Yeh aur baat k woh abb yahan nahin rehta,

Magar yeh us ka basaaya hua makaan to hai,

Ilaawa is k na kuch aur parda rakh mujh se,

Faseel-e-jism mere tere darmiyaan to hai,

Bichharr k zinda nahin reh sakenge hum dono,

Mujhe yeh vehem to hai un ko yeh gumaan to hai,

Saron pe saaya-figan abr-e-aarzu na sahi,

Hamare paas seraabon ka saayabaan to hai,

Gul-e-muraad nahin sung-haaye-tifl sahi,

Ghareeb-e-sheher ka aakhir kisi ko dehaan to hai..